Adsense

இது உங்கள் குழந்தைக்கான மகாபாரதம்


உலகத்தில் மிகவும் கஷ்டமான விஷயம் எது என்று யாராவது என்னைக் கேட்டால் குழந்தைகளுக்கு கதை சொல்வது என்று சொல்வேன். எப்போது என்ன கேள்வி கேட்கும் அந்த குழந்தைகள் என்று யாராலும் சொல்ல முடியாது. தெனாலிராமன் குழந்தையாக நடித்து கிருஷ்ணதேவராயரை ஏமாற்றிய கதை உங்களுக்குத் தெரிந்திருக்கும். எந்த விதமான prejudice-உம் இல்லாமல் ஒரு விஷயத்தை அணுகும் குழந்தைகள் அவர்கள் முன் விவரிக்கப்படும் விஷயங்கள் குறித்த தன் பார்வையை மிகவும் pictorial-ஆக தன் கண்முன் கற்பனை செய்து கொண்டு பார்பார்கள். சில சமயம் ஒரு கதாபாத்திரம் என்ன நிற சட்டை அணிந்திருந்தது என்று கூட குழந்தைகளுக்கு கதை சொல்லும் போது நாம் சொல்ல வேண்டும். ஆனால் இந்தியாவைப் பொருத்தவரை குழந்தைகள் இலக்கியம் என்பது அவ்வளவு முக்கியத்துவம் மிகுந்த ஒன்றாக கருதப்படுவதில்லை. அதை யாரும் பெரிதாக எடுத்துக் கொள்வதுமில்லை. சினிமாவில் ஒன்று கூட குழந்தைகளுக்கென்று பிரத்தியேகமானதில்லை - பெரியவர்கள் பார்க்கும் அதே சினிமாவை குழந்தைகளும் பார்க்க வேண்டும். பெரியவர்கள் படிக்கும் அதே புத்தகத்தை குழந்தைகளும் படிக்க வேண்டும். இந்த விஷயத்தில் டி வி சேனல்கள் வடிவிலாவது கொஞ்சம் விஸ்ராந்தி.

இந்த சூழ்நிலையில் வரம் வெளீயீடு வாயிலாக மஹாபாரத்தை குழந்தைகளுக்கு எடுத்துச் செல்ல வேண்டும் என்ற எண்ணமே மிகவும் உன்னதமானது. பல கிளைக் கதைகளையும் பூர்வ கதைகளையும் சில தலைமுறைகளையும் தாண்டி செல்லும் தன்மை கொண்ட ஒரு இதிகாசம் குழந்தைகளுக்கு மட்டுமல்ல பெரியவர்களுக்கும் சொல்லவதற்கு முன் ஆயிரம் முறை யோசிக்க வேண்டிய ஒரு கதை. பல குழப்பங்களையும் அதன் தீர்வுகளையும் அவற்றின் காரணங்களையும் முன் வைக்கும் ஒரு விரிவான கதையை குழந்தைகளுக்கு எடுத்து சொல்வது என்பதே கத்திமேல் நடப்பது போல மிகவும் கஷ்டமானது. அப்படி பட்ட கதையில் நடக்கும் சில சம்பவங்களுக்கு சரியான முறையில் விளக்கங்கள் தரப்பட்டாமல் விட்டுவிட்டால் அவையே தவறான முன்னுதாரணமாக விளங்கிக்கொள்ளப்படும் அபாயமுள்ள ஒரு இதிகாசம். இதன் காரணமாகவே இன்றும் குடும்பங்களில் ராமாயனம் படிக்கப்படுமளவிற்கு மகாபாரதம் படிக்கப்படுவதில்லை ( வீட்டில் படிக்கக்கூடாது என்ற சம்பிரதாயம் இன்றும் சில குடும்பங்களில் தீவிரமாக அனுஷ்டிக்கப்படுகிறது). இப்படிபட்ட ஒரு கதையை குழந்தைகளுக்கு சொல்ல வேண்டும் என்ற சிந்தனையே பாராட்டப்பட வேண்டிய விஷயம் - அதற்காக கிழக்கின் முயற்சியை நான் பாராட்டுகிறேன்.

படிப்பதற்கு மிகவும் எளிமையாக இருக்கிறது இந்த புத்தகம். நேரிடையாக பேசுவதைப் போன்ற ஒரு நடையில் எழுதப்பட்ட ஒரு புத்தகம். இந்த புத்தகத்தின் ஆசிரியர் மிகுந்த ஞானஸ்தராகவே இருக்கவேண்டும். அஷ்டவசுக்கள் குறித்த கதையும், குந்தி கிருஷ்ணரின் அத்தை (பொதுவாக கிருஷணரின் கதை கம்சனிடமிருந்தெஆரம்பிக்கும்) என்ற கதையையும், விதுரரின் ஜன்ம ரஹஸ்யமும் பல பேர் சொல்லி நான் கேட்டதில்லை. உண்மையில் விதுர நீதியையும், யக்ஷ பிரஷணமும் (யுதிஷ்டிரன், இறந்த தன் தம்பிகளை மீட்க யக்ஷனின் பரிக்ஷைக்கு ஆளாகும் படலம்) தர்ம பாடங்கள்.

ஆனால் இந்த புத்தகத்தைப் பற்றிய பல குழப்பங்கள் எனக்கு இருக்கிறது - சில கேள்விகளும்.
  1. முதலில் இது குழந்தைகள் படிப்பதற்காக எழுதப்பட்ட புத்தகமா அல்லது bedtime story சொல்வது போல் குழந்தைகளுக்குப் படித்து காட்டுவதற்காக எழுதப்பட்ட புத்தகமா ? படித்துக் காட்டுவதற்கென எழுதப்பட்ட புத்தகம் என்பதே பொருத்தமாக இருக்கும் என்று எனக்குத் தோன்றுகிறது - அப்படி என்றால் புத்தகத்தில் ஒரு flow இல்லையே - இது குறித்து விரிவாக கீழே எழுதுகிறேன்.
  2. குழந்தைகளுக்கு சொல்லப்படும் மஹாபாரத்தை இரண்டு விதமாக அனுகலாம் - முழுமையான கதையை மிகவும் மேலோட்டமாக சொல்லலாம் பாண்டுவிலிருந்து ஆரம்பித்து கடைசியில் பாண்டவர்கள் ஜெயித்தார்கள் என்று சொல்லலாம் - அல்லது, மகாபாரத்தில் இருக்கும் கிளைகதைகளில் இருக்கும் கதைகளை எடுத்து அதிலிருந்து ஒரு நீதியை சொல்லிமுடிக்கலாம். என்னைப் பொருத்தவரை இந்த புத்தகம் இரண்டு வகைகளிலும் இல்லை.
  3. அஷ்டவசுக்களிலிருந்து ஆரம்பமாகும் இந்த புத்தகம் சில கிளைகதைகளில் புகுந்து அதன் போக்கை இழந்து விட்டது என்று தோன்றுகிறது. குறிப்பிட்டு சொல்லவேண்டுமென்றால், கீழே கொடுக்கப்பட்டுள்ள கிளைகதைகள் இந்த புத்தகத்திற்கு தேவையில்லை என்று தோன்றுகிறது
    • தேவயாணி மற்றும் யயாதி கதைகள்
    • பீஷமரின் ஜென்ம ரஹஸ்யம் குறித்த கதை
    • வாதாபியின் கதை
    • ஜராசந்தன் வதம் குறித்து இரண்டு அத்தியாங்களில் பேச தேவயில்லை என்பது என் எண்ணம்
  4. குழந்தைகளால் பெரிய பெரிய சித்திரங்கள் இல்லாமல் இது போன்ற ஒரு கதையை வாசிக்க முடியும் என்று நினைக்கிறீர்களா ?
  5. மற்ற கதைகளைப் பற்றி விரிவாக பேசிவிட்டு கிருஷணரின் சரிதையை ஏன் மருந்துக்கு கூட தொடவில்லை ?
  6. இந்த பதிவின் ஆரம்பத்தில் சொன்ன யஷ பிரஷணத்தைக் குறித்து நான் அறிந்த கதை கொக்கு யுதிஷ்டிரனைக் கேள்வி கேட்பதாக அன்று - அசிரீரி (யஷனின் அசிரீரி) கேட்பதாக. மஹாபாரதத்தில் இதை யக்ஷ பிரஷணம் என்ற படலமாக விவரிப்பார்கள் - அகஸ்தியர் குழுவில் இது குறித்த ஒரு பதிவு (http://groups.yahoo.com/group/agathiyar/message/34107). என் அப்பாவிடம் இது குறித்து நான் கேட்ட போது அவரும் என் கருத்தை ஆமோதித்தார். அதனால் நான் சொல்வது சரியென்றே நினைக்கிறேன்.
மேலே flow இல்லையென்று நான் சொன்னேன் இல்லையா. அது குறித்த நான் காணும் சில குறைகள்
  1. 10வது அத்தியாயம் கடைசியில் - பாண்டவர்களை அழிக்கப் பிளான் போட்டான் என்பதை சொல்லும் பீடிகையாக முடிகிறது. ஆனால அடுத்த அத்தியாமோ குருகுல வாசத்தின் போது நடந்த இன்னொரு சம்பவத்தை விவரிப்பதாக அமைந்து விட்டது.
  2. 11வது அத்தியாத்தின் இறுதியில் துருபதன் என்ன சொன்னான் தெரியுமா என்பதாக இறுதி வாக்கியம் இருக்கிறது. ஆனால் அவன் என்ன சொன்னான் என்று எங்கேயும் சொல்லப்படலில்லை - 12வது அத்தியாயம் அப்படி தான் துவங்கப்படல் வேண்டும் குழந்தைகளுக்கு. (15 -16 ஆம் அத்தியாத்தில் இருக்கும் கோர்வை முன் சொல்லப்பட்ட அத்தியங்களில் இல்லை)
  3. 18வது அத்தியாத்தின் துவக்க பாரா கீதோபதேசத்துக்கு முன்னோட்டமாக எழுத நினைத்ததோ ? மேலும் ராஜசுய யாகத்துக்கு கிர்யாஊக்கி யார் என்பதை தெளிவாக சொல்லவில்லையே - நாரதர் செய்ய சொல்கிறாரா அல்லது ராஜாக்களா ? (19 வது அத்தியாத்தையும் சேர்த்து படிக்கவும்)
  4. கர்ணனின் கதையை ஒரே அத்தியாத்தில் முடிக்கவேண்டும் என்ற கட்டாயம் இருப்பது போன்ற தோற்றத்தை 13வது அத்தியாயம் ஏற்படுத்திவிட்டது. 72ஆம் பக்கத்தில் கடைசி பாராவுக்கும் முந்தைய பாரா வில்வித்தை போட்டி நடக்கும் அரங்கத்து காட்சி குறித்து எழுதியது என்று நினைக்கிறேன். அடுத்த பாரா பகைமை நன்கு வளர்ந்த சூழலில் அர்ஜுணனைக் காக்க இந்திரன் நடத்தும் நாடகம் - இவை இரண்டையும் அடுத்தடுத்து எழுதியது என்னவோ போட்டியில் அர்சுணன் தோக்காதிருக்க இந்திரன் நடத்திய நாடகம் போன்ற தோற்றத்தை ஏற்படுத்திவிட்டது.
  5. சிசுபாலனுக்கு நூறு முறை மன்னிப்பு அளிப்பதாக கிருஷ்ணன் சொன்னதற்கு ஒரு பின்கதை இருக்கிறதே. அதை சொல்லியிருக்கலாம் அல்லது சிசுபாலன் வதத்தைப் பற்றியே எதுவும் சொல்லாமல் விட்டிருக்கலாம்.
  6. 22ஆம் அத்தியாத்திலேயே அக்யான வாசம் பற்றி சொல்லிவிட்டு 24வது அத்தியாத்திலும் 25வது அத்தியாயத்திலும் மீண்டும் வனவாசம் குறித்த கதை எழுதியிருப்பது படிப்பதற்கு இடையூராக அல்லவா இருக்கும்.
  7. 142வது பக்கதில் திரௌபதியின் சபதம் முடிந்ததாக எழுதியிருக்கிறது. ஆனால் திரௌபதி சபதம் செய்ததாக எங்கேயும் எழுதவில்லை.
  8. அதே போல சல்லியனைப் பற்றியும் 142-ஆம் பக்கத்தில் தான் புதிதாக சொல்கிறீர்கள்
  9. 119ஆம் பக்கத்தில் ஒரு வருட அக்ஞான வாசம் பற்றி புதிதாக சொல்கிறீர்கள் - 21ஆம் அத்தியாத்திலும் வேறு எங்கும் ஒரு வருட அக்ஞான வாசம் குறித்து எழுதவில்லை
இந்த புத்தகத்தின் நோக்கத்துக்காக இந்த புத்தகத்துக்கு 100 % மதிப்பெண் கொடுக்க விரும்பும் நான் product-ஆக இந்த புத்தகத்துக்கு 20 %க்கு மேல் மதிப்பெண் கொடுக்க மாட்டேன். இந்த புத்தகத்தின் நோக்கம் சரியான முறையில் செயல்படுத்தப்படவில்லை என்பது என் எண்ணம். கிழக்கு பதிப்பகம் இந்த புத்தகத்தை முழுவதுமாக மறுபரிசலனை செய்து இந்த புத்தகத்தில் இருக்கும் பல குறைகளை திருத்தி மீண்டும் மறு பதிப்பு வெளியிட வேண்டும் என்பது என் தாழ்மையான கோரிக்கை.

No response to “இது உங்கள் குழந்தைக்கான மகாபாரதம்”

 
© 2009 அஞ்சறைப் பெட்டி.
Design by psdvibe | Bloggerized By LawnyDesignz |Ad block added by krishchandru | Distributed by Deluxe Templates | Header photo by Kannan Seetharaman